Кэлэр сыл от ыйын 12 күнүгэр олоҕун   иитэр-үөрэтэр үлэҕэ, ыччаты сиэр-майгы, эт-хаан өттүнэн сайыннарыыга анаабыт   Петр Николаевич Соколов 100 сааһын туолар.

Соколовтар Күндээдэҕэ 1976 сыллаахха көһөн кэлбиттэрэ уонна уонча сыл биһиги дьоммутунаан дьиэ тастыы олорбуттара. Петр Николаевич математика учууталынан, кэргэнэ Екатерина Семеновна балыыһаҕа медcиэстэрэнэн үлэлээбиттэрэ.
Петр Николаевич күүстээх учуутал буолара оскуолаҕа тута биллибитэ. Биһиги кылааспытын кини үөрэппэтэҕэ, мин бииргэ төрөөбүт орто быраатым киниэхэ үөрэммитэ. Петр Николаевич уруоктарын атын учууталлартан олох   уратытык ыытарын туһунан ахтааччы. Оҕолор бэйэ-бэйэлэригэр көмөлөсүһэн ким быһааран, ким устан уруок матырыйаалын билэллэр эбит этэ. Ийэлэрэ Екатерина Семеновна наһаа налыччы, үчүгэй майгылааҕа. Биһиги ийэбитин кытары истиҥ-иһирэх сыһыаннаахтара, тилийэ тиэргэннээх ыаллар ийэлэрин   быһыытынан, ылса-бэрсэ, киирэ-тахса билсэ тураллара. Оҕолоро бэһиэн үөрэхтэригэр олус дьоҕурдаах, үчүгэй иитиилээх этилэр. Мин кинилэр иккис уоллара Сашаны кытары бииргэ үөрэмитим. Хас да оҕолоро математикаҕа дьоҕурдаах буоланнар, Үөһээ Бүлүүтээҕи физмат оскуолаҕа, ССРС народнай учуутал Михаил Андреевич Алексеевка   үөрэммиттэрэ.
Петр Николаевичтыын сибээстээх оскуолатааҕы сааспыттан икки түгэни өйдөөн хаалбытым. Ахсыс кылааһы бүтэрэрбитигэр, биһиги кылаастан экзамен тутан баран, миэхэ: “Үөһээ Бүлүүтээҕи физмат оскуолаҕа баран туттарсан көрбөккүн дуо?” -- диэн турардаах. Оскуолаҕа үөрэнэр кэммэр хайдах эрэ математиканы олус ылыммат этим, баҕар, киниэхэ үөрэммитим буоллар, бу предмети сөбүлүөм эбитэ буолуо. 30 сааспын ааһан баран, иккис идэбэр, экономист үөрэҕэр үөрэнэн, 25 сыл устата үпкэ-харчыга сыһыаннаах салайар үлэлэргэ үлэлээн кэллим. Уопуттаах педагог Петр Николаевич миигин суокка-учуокка чугаспын оччолортон билбит буоллаҕа. Иккис түгэн. Оскуолаҕа үөрэнэр кэммэр көҥүл тустуунан дьарыктанарым. Биирдэ Петр Николаевич оройуон күрэхтэһиитигэр тустарбын көрөн баран: “Саша үчүгэйдик толкуйдаан тустар эбиккин”, -- диэн хайҕаан турардаах. Кини бэйэтин кэмигэр ситиһиилээхтик туста сылдьыбыт уонна дойдутугар биллэр тустууктары иитэн таһаарбыт   тренер этэ.
Соколовтар Күндээдэҕэ уонча сыл олорон баран, кыра кыыстара Еля оскуоланы бүтэрэригэр, 1985 сыллаахха Дьокуускайга көспүттэрэ. Петр Николаевич куоракка доруобуйаларынан хааччахтаах оҕолор интернат-оскуолаларыгар   үлэлээбитэ. Кинилиин мин Үөрэх министерствотыгар үлэлиир кэммэр көрсүһэр буолбутум. 70 сааһыгар чугаһаан баран, Петр Николаевич ыраах Муомаҕа тиийэн, Улахан Чыыстай оскуолатыгар 1991-1993 сс. математика учууталынан үлэлээбитэ. Улуус салалтатын, Үөрэх министерствотын кытары элбэх кэпсэтиини ыытан, дойдутугар   Чкаловка орто оскуоланы арыйтаран, онно директорынан 1995-1997 сс. үлэлээбитэ.