Биһиги дьиэ кэргэн улаханнык убаастыыр күтүөбүт Петр Николаевич Соколов Ньурба оройуонугар биир биллэр дириҥ опыттаах педагог – математик этэ. Мин кинини бэйэбин ейдүүр буолуохпуттан билэбин. Күтүөбут кэпсээн- ипсээн, күлэн-үөрэн киирэрэ харахпар бу көстөр. Оскуолабыттан кэлэрбэр сороҕор киирэн олорор буолар этэ, онно миигин дьээбэлии тоһуйааччы: «Бу аһара элбэх биэһи ылан бартыбыалын кыайбакка соһон муннуктарын алдьаппыт эбит», - диирэ. Ол саҕана илиигэ тутар бартыбыаллаах буолааччыбыт , онтубут муннуктарыгар тимирдээх буолааччы, тимирдэрэ түһэн хаалан ол сиринэн дьөлө барар этэ. Ону көрөн дьээбэлээн тоһуйара өйбөр хатаммыт. Урут билиҥҥи курдук элбэх массыына суох, онон дэриэбинэттэн киирбит аймахтарбыт эбэһээт хонон-өрөөн дьыалаларын ситиһэн тахсааччылар. Ити кэмнэртэн саҕалаан кэргэмминээн Василий Дмитриевичтыын ыал буолар уруу киэһэтигэр сылдьан, биһиги дьиэбитигэр кэтэһиилээх ыалдьыт, оҕолорбутугар Эһээ Соколов буолбута. Оннооҕор сиэннэрбитигэр эйэҕэс Эһээ этэ, сиэммин Викуляны биир эрэ саастаах киһини Дьокуускайтан илдьэ кэлэн турардаах.
Биһиги кэргэмминээн Бүлүүтээҕи педучилищены бүтэрэн 1975с Ньурбаҕа кэлэн үлэ көрдөспүппүт, ол саҕана олох учуутал миэстэтэ суох этэ. Онно мин күтүөм 1-Хаҥаласка оскуола директора буолан декрекка барбыт учууталлар оннуларыгар биһигини учууталынан ылбыта. Онтон ыла биһиги үөрэҕирии эйгэтигэр үлэбит саҕаламмыта. Күтүөм онно элбэххэ үөрэппитэ, онтон олук ылан биир сыл үлэлээн баран Маарга көһөн кэргэним Василий Дмитриевич интернат сэбиэдиссэйинэн, геограбынан үлэлээбитэ. Кини Петр Николаевиһы улаханнык убаастыыр этэ. Кэлин да куруук керүстүлэр да ирэ-хоро кэпсэтээччилэр уонна куоракка командировкага бардаҕына наар Соколовтарга түһэрин олус сөбүлээччи. Эдьийбин Екатерина Семеновнаны олус учугэйдик саныыр этэ, аргыый сэмээр сылдьан наар сүбэлиир диирэ.
Петр Николаевич оройуон биир саамай кыахтаах математик учуутала, оскуола салайааччыта этэ, үөрэппит оҕолоро да кини дириҥ билиини биэрбитин, ирдэбиллээҕин туһунан үтүөтүк ахтааччылар. Күтүөбүт эдьийбитинээн Екатерина Семеновналыын 5 оҕону төрөтөн, иитэн-такайан атахтарыгар туруоран, үөрэхтээх дьон оҥортоон дьоллох олоҕу олорон сирдээҕи аналын толорон бардаҕа... Мин кэргэним Василий Дмитриевич 47 сааһыгар саас ыам ыйыгар соһуччу олохтон туораабытыгар сайын эдьийбинээн куораттан кэлэннэр, оҕобутун Баһылайы тиһэх суолугар атаарбатахпыт диэн кладбищаҕа тахса сылдьыбыппыт. Онно күтүөм ыалдьа сылдьар эбит, ону биһиэхэ олох биллэрбэтэҕэ, ити биһиэхэ бүтэһик сырыыта этэ, кэлэн нэдиэлэ курдук буолан барбыттара.
Петр Николаевич үтүө мөссүөнэ үөрэппит оҕолоругар, бииргэ үлэлээбит коллегаларыгар, аймахтарыгар, дьонугар – сэргэтигэр үтүө өйдөбүл буолан хааллаҕа. Билигин күтүөм, эдьийим   оҕолоро, сиэннэрэ кинилэр ааттарын ааттатан таһаарыылаахтык үлэлии- хамсыы сылдьалларын истэн киһи үөрэр, өссө да ааттатыахтара турдаҕа.
Улаханнык убаастыыр күтүөбүт мөссүөнэ сүрэхпитигэр мэлдьи тыыннаах буолуоҕа.