Оскуола директора диэн үрдүк ааты мээнэ киһи чиэстээхтик сүкпэт. Бастатан туран,
кини олоҕу, дьону, оҕолору таптыахтаах.
  Оннук директоры кытта үлэлээн ааспыппынан мин дьоллоохпун. Петр Николаевич Соколов директорынан 1 Хаҥалас оскуолатыгар үлэлии сырыттаҕына, 1972 сыллаахха мин интернакка баспытааталынан үлэбин саҕалаабытым.
Ол кэмҥэ ЯГУ филологическай факультетыгар нууча тылын отделениятыгар кэтэхтэн үөрэнэр этим.
1974 сыллаахха Акана уолугар Березкин Василий Игнатьевичка кэргэн тахсыбытым.
Петр Николаевич миигин, идэҕинэн үлэлээ диэн, оскуолаҕа нууча тылын уонна литературатын учууталынан ылбыта. Эбии ырыа уруогун биэрэрим.
  Иннэ гынан үөрэппит учууталбын Вера Моисеевна Тарасованы кытта үлэлиир дьолломмутум. Дьүөгэм, ыкса ыалым Клавдия Прокопьевна Иванова эмиэ нууча тылын үөрэтэрэ. Завуч Вера Николаевна- математика учуутала этэ.
Бэйэм үөрэммит оскуолам буолан, үөрэппит учууталларын кытта бииргэ үлэбин саҕалаабытым. Саха тылын учуутала Василий Егорович; биология, химия учуутала, кылааһым салайааччыта Анна Афанасьевна, история, география учуутала Николай Маркович.
Оскуола "Дифференцированное обучение" диэн теманы үөрэтэн, онон үлэлиирэ. Хас биирдии оҕону үөрэтэргэ, иитэргэ туһулаан хас биирдии учуутал чопчу соругу ылынара. Педсовекка үлэни хайдах ыытары отчуоттааһын, ырытыы буолара. Мин уруоктарбар Петр Николаевич, Вера Николаевна, Вера Моисеевна элбэхтик сылдьаллара, сүбэлииллэрэ. Биирдэ
  РОНО- тан инспектордар тахсан бэрэбиэркэ ыыппыттара, уруоктарга сылдьыбыттара. Үөрэтэр кылааспар 24 оҕо баара, уолаттар элбэхтэр, кыргыттар аҕыйахтар. Оҕолорум хоп курдук эппиэттээн, эрчиллии оҥорон, уруок этэҥҥэ ааспыта. Түмүктүүр педсовекка инспектор:"Эдэр учуутал элбэх оҕону кыайа тутан, уруок сыалын ситтэ"- диэн хайҕаабыта. Ити бастакы   хайҕабыл   48 сыл учууталынан үлэлиирбэр улахан төһүү буолбута. Бу Петр Николаевич уонна атын биир идэлээхтэрим эдэр учууталлары кытта ситиһиилээх үлэлэрин түмүгэ.
    Маны таһынан ол кэмҥэ оҕолор спордунан утумнаахтык дьарыктанар этилэр. Көҥүл тустууга ыаллыы оскуола оҕолорун кытта көрсүһүүлэрэ, хайыһарга сүүрүү, художественнай самодеятельность фестивалларын, концерынан гастроллар, "Зарница" военно-спортивнай оонньууну ыытыы, оттук мас бэлэмнээһинигэр коммунистическай субботниктар- барыта Петр Николаевич көҕүлээһининэн барара. Кини киһи быһыытынан аламаҕайа, оскуола үлэһиттэригэр, оҕолорго кэмигэр сөптөөх көмөтө- директор быһыытынан хаалларбыт үтүөтэ, өйдөбүлэ, ситиһиитэ!